निजी अस्पतालहरुले पनि आरडिटी विधिमार्फत कोरोना परीक्षण गर्न पाउने


४ जेठ, काठमाडौं । निजी तथा सामुदायिक अस्पतालहरुले र्‍यापिड डायग्नाेस्टिक टेस्ट (आरडीटी) विधिमार्फत कोरोना परीक्षण गर्न पाउने भएका छन् ।  

स्वास्थ्य तथा जनसङ्ख्या मन्त्रालयकाे अनुसार अनुमति लिएर निजी तथा सामुदायिक अस्पतालहरुले आरडीटी परीक्षण गर्न पाउने भएका हुन् ।

मन्त्रालयका प्रवक्ता डाक्टर विकास देवकोटाले कोरोना भाइरसको परीक्षणमा सहजता प्रदान गर्न निजी तथा सामुदायिक अस्पतालहरुलाई आरडीटी परीक्षण गर्न पाउने गरी निर्देशिका जारी गरिएको बताए ।

उनले भने, “नियम अनुसार दर्ता भएको हुनुपर्नेछ ।  यदि सूचीमा  नभएकाले आरडीटी किट प्रयोग गर्न चाहेमा राष्ट्रिय जनस्वास्थ्य प्रयोगशालाबाट अनुमति लिनुपर्ने छ । ”

मन्त्रालयका प्रवक्ता डा. देवकोटाका अनुसार उपत्यका भित्र स्वास्थ्य सेवा विभागबाट र उपत्यकाबाहिर सम्बन्धित प्रदेश निर्देशनालयबाट अनुमति लिन पाउने छन् ।

आरडीटी परीक्षण गर्दा निजी अस्पतालहरुले शुल्क लिन सक्नेछन् । अस्पतालले किट खरिद गरेको मूल्यमा बढीमा २० प्रतिशत जोडेर शुल्क लिन पाउने छन् । 

प्रतिक्रिया दिनुहोस्


सम्बन्धित समाचार