ओभरहेड ब्रिज निर्माण गर्ने मन्त्री महासेठकाे घोषणा


२८ साउन, काठमाडौं । भौतिक पूर्वाधार तथा यातायातमन्त्री रघुवीर महासेठले एक वर्षभित्र काठमाडौंलाई सुन्दर सहरको रुपमा चिनाउने दाबी गरेका छन् ।

सोमबार काठमाडौंमा आयोजित साक्षात्कार कार्यक्रममा उनले चालू आर्थिक वर्षभित्रै काठमाडौंको सडकमा स्मार्ट लाइटको व्यवस्था गर्ने पनि बताए ।

मन्त्री महासेठले यसका लागि सरकारले आवश्यक बजेटको समेत व्यवस्था गरिसकेको जानकारी दिए । “काठमाडौंलाई एक वर्षभित्र सुन्दर सहरको रुपमा विकास हुने गरी पूर्वाधार निर्माणको कामलाई सम्पन्न गर्ने लक्ष्य राखेको छु,” महासेठले भने ।

मन्त्रालयले काठमाडौंमा ट्राफिक जाम सडकका हुने मुख्य–मुख्य स्थानमा ‘ओभरहेड ब्रिज’ निर्माण गर्ने घोषणा गरेको छ ।

मन्त्री महासेठले काठमाडौंको कोटेश्वर, गौशाला, नयाँ बानेश्वर, चाबहिल, थापाथली र कालिमाटी चोकमा ओभरहेड ब्रिज निर्माण गर्ने घोषणा गरेका हुन् ।

यसका लागि आवश्यक डिजाइनको काम सुरु भइसकेको मन्त्री महासेठको भनाइ छ ।

मन्त्री महासेठले मुलुकमा रेल यातायात सेवा सञ्चालनका लागि रेलमार्ग निर्माणको कामलाई पनि अघि बढाइएको बताए ।

सम्बन्धित समाचार