अमेजन जंगलबारे बुझ्नै पर्ने कुरा


११ भदौ, एजेन्सी । ‘हर्ट अफ अक्सिजन’ भनेर चिनिएको अमेजनको जंगलमा धेरैतिर एकसाथ लागेको डढेलोले यति बेला अन्तर्राष्ट्रिय चासो जन्माइरहेको छ।

ब्राजिल, पेरु, कोलम्बिया, भेनेजुयला, इक्वेडर, बोलिभिया, गुयाना, सूरीनाम र फ्रेन्च गुयाना गरी नौ देशमा फैलिएको अमेजन संसारकै सबैभन्दा धेरै वर्षा हुने जंगल हो ।

अमेजन जंगलको ६० प्रतिशत भाग ब्राजिलमा पर्छ जुन विश्वकै सबभन्दा ठूलो उष्ण वन्य क्षेत्र हो। यो जैविक विविधताको लागि अत्यन्तै महत्वको ठाउँ पनि हो जहाँ अजीव-अजीव जातका प्राणी र वनस्पति बाँच्दै आइरहेका छन्।

विश्वको एक तिहाइ मुख्य वन यहाँ रहेको छ, जसले हरेक वर्ष ९० देखि १४० अर्ब टन कार्बन सोस्ने गर्दछ । जसका कारण ग्लोबल वार्मिंग रोक्न मद्दत पुगिरहेको छ ।

जलवायु परिवर्तनका लागि हरितगृह ग्यासलाई सबभन्दा महत्वपूर्ण मानिने भएकाले वैज्ञानिकहरूले अमेजन जोगाउनु भनेको वैश्विक तापमानसँग लड्ने सबभन्दा बलियो हतियार तिखार्नु हो पनि भन्दै आएका छन्।

ब्राजिलका जंगलहरूमा यतिबेला ठूलो डढेलो लागिरहेको छ जुन कम्तीमा पनि छ वर्षयताकै उच्चतम विन्दु हो। एक वर्षअघिको उत्तिकै अवधिका तुलनामा यसपाला अगस्ट २३ तारिखसम्म लागेको आगलागीको मात्रा ८४ प्रतिशत् बढी भएको जानकारी ब्राजिलको खगोल अनुसन्धान केन्द्रले जनाइसकेको छ। यो वर्षभरमा ब्राजिलका जंगलहरूमा ७८ हजार तीन सय ८३ पटक आगलागी भइसकेकामा यो अगस्ट महिनामा मात्रै त्यसको मोटामोटी आधा छोइसकेको छ।

५५ लाख वर्ग किमीमा फैलिएको अमेजनको जंगललाई ‘धरतीको मुटु’ मानिन्छ । यही जंगलबाट विश्वलाई आवश्यक पर्ने २० प्रतिशत अक्सिजन प्राप्त हुन्छ ।

उता आगलागीको लागि ब्राजिलका राष्ट्रपति जेर बोल्सोनारोले पर्यावरण संरक्षणमा काम गरिरहेको गैर सरकारी संस्थामाथि आरोप लगाएका छन् भने पर्यावरणविद्हरुले भने राष्ट्रपतिको नीतिको आलोचना गरेका छन् ।

विश्वकै पर्यावरणमा महत्व राख्नेगरी यो घना (उष्ण कटबन्धीय) जंगल यसरी विनाश भइरहेको बेला ब्राजिलका राष्ट्रपति जैर बोल्सोनारोले  आगलागी नियन्त्रण निम्ति सेना परिचालनको आदेश दिइसकेका छन्।

यो  जंगलमा ३० हजार प्रजातिका वृक्ष, २५ सय  प्रकारका माछा, १५ सय प्रकारका चराचुरुङ्गी, ५ सय प्रकारका स्तनधारी, ५५० प्रकारका सरीसृप र २५ लाखभन्दा बढी प्रकारका किराहरु रहेका छन् ।

गएको २० वर्षमा २ हजार २ सय नयाँ बोटविरुवा र जीवहरु यहाँ खोजिएका छन् । ६ हजार ९ सय किमीमा बग्ने अमेजन नदी विश्वको दोस्रो ठूलो नदी हो ।

सम्बन्धित समाचार