अपहरण गरी बन्धक बनाउने सात जना पक्राउ


२३ भदौ, काठमाडौं । काठमाडौं तार्केश्‍वर  बस्ने नुवाकोटका  पेम्बा तामाङलाई अपहरण गरी बन्धक बनाएको अभियोगमा ७ जनालाई  प्रहरीले पक्राउ गरेको छ ।

पक्राउ पर्नेहरुमा काठमाडौं ईचंगु बस्ने सिन्धुलीका पूर्णबहादुर वाईवा, काठमाडौं महानगरपालिका बाफल बस्ने राजु खड्गी, काठमाडौं कलंकी बस्ने रसुवाका  पाल्साङ तामाङ, काठमाडौं जमल बस्ने रामेछाप दोरम्बाका लिला थापा मगर, भक्तपुर सूर्यविनायक बस्ने रामेछाप दोरम्बा का  शिवराम थापा मगर, काठमाडौं टोखा बस्ने सुनसरीका  राजेश गुरुङ र रसुवाका  जिस घले रहेका छन् ।

कलंकी मकालु पेट्रोल पम्पको नजिकबाट शनिबार बिहान पेम्बा तामाङलाई केही मानिसहरुले गाडीमा लिई गएको भन्ने खबर प्राप्त हुनासाथ खटिएको प्रहरीले खोजतलास गर्ने क्रममा काठमाडौं महानगरपालिका-१५ छाउनीस्थित  अर्जुन लामाको घरमा  पेम्बा र उनीहरुलाई फेला पारी नियन्त्रणमा लिएको हो ।

साथै अपहरित पेम्बा तामाङ समेतले ठगी गरेको बुझिन आएको हुँदा उनलाई ठगी मुद्धा तथा अन्य ७ जनालाई अपहरण तथा शरिर बन्धक मुद्धामा थप अनुसन्धान भइरहेको महानगरीय प्रहरी वृत्त कालिमाटीले जनाएको छ ।

सम्बन्धित समाचार