डेंगु परीक्षण नि:शुल्क गर्न पनि सरकारलाई कांग्रेस सांसदकाे आग्रह


२५ भदौ, काठमाडौं । नेपाली कांग्रेसका सांसद राधेश्याम अधिकारीले मुलुकमा डेंगुको महामारी फैलिसकेकाले सरकारले संकटकाल घोषणा गर्नुपर्ने बताएका छन् ।

राष्ट्रियसभाको विशेष समयमा बोल्दै उनले सरकारले स्वास्थ्य क्षेत्रको संकटकाल घोषणा गरेर डेंगु नियन्त्रणको प्रयास गर्नु पर्ने बताए ।

‘७७ जिल्लामध्ये ५६ जिल्लामा डेंगु फैलिसकेको छ, यो राष्ट्रिय महामारी हो कि होइन ? राष्ट्रिय विपत्ति मान्नुपर्छ कि पर्दैन ?’ उनले सोधे, ‘स्वास्थ्यमा संकटकाल घोषणा गर्नु पर्छ कि गर्दैन ?’

सांसद अधिकारीले पश्चिम नेपालको बाँके र बर्दियामा डेंगु सुरु हुँदा नियन्त्रणको प्रयास प्रभावकारी नभएकै कारण अहिले ५६ जिल्लामा फैलिएको बताए । ‘५६ जिल्लामा डेंगु फैलिसकेको छ । हिजो हामीले पश्चिमको बाँके बर्दियामा हुँदा त्यहीँ लोकलाइज गर्न सक्थ्यौं । त्यसको प्रभाव यहाँ आइसकेको छ । अहिले राष्ट्रिय इमरजेन्सीको रुपमा लिन सक्दैनौं भने यसले महामारीको रुप लिन्छ,’ उनले भने ।

डेंगुका कारण आम जनतामा भय र त्रास सिर्जना भएको भन्दै सांसद अधिकारीले सरकारबाट आधिकारिक दृष्टिकोण नआउँदा सर्वसाधारण असमन्जसमा परेको बताए ।

सांसद अधिकारीले डेंगु परीक्षण नि:शुल्क गर्न पनि सरकारलाई आग्रह गरे ।

प्रतिक्रिया दिनुहोस्


सम्बन्धित समाचार