काठमाडौँ । आज लुम्बिनी प्रदेश स्थापना दिवस मनाइँदैछ।
यस अवसरमा लुम्बिनी प्रदेश सरकारले प्रदेशभर सार्वजनिक बिदा दिएको छ।
प्रदेश स्थापना दिवसको शुभकामना सन्देशमा मुख्यमन्त्री चेतनारायण आचार्यले संघीयताको सवलिकरण र सफल अभ्यास लुम्बिनी प्रदेशबाट सम्भव भएको सन्देश देशभर दिन सफल भएको बताएका छन्। उनले प्रदेशलाई आत्मनिर्भर, प्रभावकारी र जनउत्तरदायी बनाउने दिशामा सरकार दृढताका साथ अघि बढिरहेको स्पष्ट पारे।
मुख्यमन्त्री आचार्यका अनुसार प्रदेश सरकार गठनपछि संविधानले दिएको अधिकारको कार्यान्वयनका लागि आवश्यक ऐन, कानुन र नीतिगत संरचना निर्माण गरिएको छ। पूर्वाधार विकास, शिक्षा, स्वास्थ्य, रोजगारी, पर्यटन र कृषि क्षेत्रलाई प्राथमिकतामा राख्दै सन्तुलित विकासमा जोड दिइएको उनले बताए।
सुशासन, पारदर्शिता र भ्रष्टाचार नियन्त्रणलाई सरकारको मुख्य आधार बनाइएको उल्लेख गर्दै उनले चालु खर्च नियन्त्रण र पुँजीगत खर्च वृद्धि गरी विकास आयोजना अघि बढाइएको जानकारी दिए।
