१८ असोज, काठमाडौं । नेपाली कांग्रेसको १५ महाधिवेशनबाट पार्टीको प्रभावशाली पदाधिकारी पदमा लुम्बिनी प्रदेशबाट सभापति, दुई उपसभापति, महामन्त्री र सहमहामन्त्रीमा उम्मेदवार सार्वजनिक भएर तयारीमा छन् ।
यसका लागि सभापतिमा बर्दियाका किशोरसिंह राठौर, उपसभापतिमा दाङका दीपक गिरी र अर्घाखाँचीका पुष्पा भुसाल, महामन्त्रीमा रोल्पा, हाल बाँकेका अमरसिंह पुन, सहमहामन्त्रीमा योगेन्द्र चौधरी लड्ने तयारीमा छन् । उनीहरुले सामाजिक सन्जालमार्फत उम्मेदारी सार्वजनिक गरी सचिवालयसमेत बनाएर अघि बढेका छन् ।
उनीहरुमध्ये सभापतिमा लड्ने घोषणा गरेका किशोरसिंह राठौर अहिलेसम्म प्रतिनिधि छानिएका छैनन् । उनी पूर्वसहमहामन्त्री हुन् शेरबहादुर देउवा सभापति रहेको समयमा । सभापतिमा धेरै नेताले गगन थापा निर्विरोध हुने बताइरहेका बेला राठौरले आफू सभापतिको उम्मेदवार रहेको घोषणा गरिसकेका हुन् । सभापतिमा अरुको चर्चा देखिदैँन तर अन्य पदमा भने धेरै आकांक्षी देखिएका छन् ।
उपसभापतिमा उम्मेदारी घोषणा गरेका दाङका गिरी पूर्वकेन्द्रीय सदस्य तथा पूर्वमन्त्री हुन् । अर्का उपसभापति भुसाल विशेष महाधिवेशनबाट उपसभापति बनेकी हुन् । पूर्वउपसभामुखसमेत रहेकी उनी यसअघि देउवा समूह छाडेर गगनतिर लागेकी हुन् । त्यसैगरी महामन्त्रीमा उम्मेदवारी घोषणा गरेका अमरसिंह पुन अहिले लुम्बिनी प्रदेशका सभापति हुन् । पहिलेबाटै गगन पक्षमा खुलेका उनले सचिवालय नै बनाएर तयारी गरिसकेका छन् ।
सहमहामन्त्रीमा अहिले पनि रहेका योगेन्द्र चौधरी दोहोरिने तयारीमा छन् । पहिले देउवा समूहबाट आएका उनी विशेष महाधिवेशनबाट सहमहामन्त्री बनेका हुन् ।
महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारको मनोनयनपत्र दर्ता सोमबार हुने भएको छ । असोज १९ गते सोमबार दिउँसो २ बजेदेखि साँझ ६ बजेसम्म काठमाडौँस्थित राष्ट्रियसभा गृहमा उम्मेदवारहरूको मनोनयनपत्र दर्ता गर्ने तालिका सार्वजनिक भएको छ । तोकिएको समयभित्र सम्पूर्ण केन्द्रीय महाधिवेशन प्रतिनिधि सदस्य तथा महाधिवेशनबाट उम्मेदवार बन्न योग्य व्यक्तिहरूले मनोनयनपत्र दर्ता गर्न सक्ने उल्लेख छ ।
सभापति घोषणा गरेका राठौरलाई रोक्ने प्रयास कि उनकै कमजोरी
१५ औं महाधिवेशनमा सभापतिको उम्मेदारी घोषणा गरेका किशोरसिंह राठौर अहिलेसम्म प्रतिनिधि नै छानिएका छैनन् । यसअघि निवर्तमान केन्दीय सभापतिका विश्वास पात्रका रुपमा रहेका राठौर अहिले सभापति गगन थापाको पक्षमा खुलेका छन् । उनको सदस्यता रहेको बर्दियाको क्षेत्र नं २ मा आइतबार बिहानसम्म प्रतिनिधि छनौट हुन नसकेको हो । पूर्वसहमहामन्त्री रहेका राठौर केही दिनयता जिल्लामै बसेर यसको टुंगो लगाउन खोजे पनि सफल भएका छैनन् । काठमाडौंमा आज महाधिवेशन उद्घाटन गर्ने कार्यक्रम भए पनि यहाँबाट प्रतिनिधि नै टुंगो नलागेपछि नेताकार्यकर्ता आक्रोशित बनेका छन् ।
पार्टीका नेताहरुले निर्वाचन समितिले निर्णय लिन नसकेर असक्षम भएको आरोप लगाएका छन् भने निर्वाचन समितिले असुरक्षा भएका कारण गर्न नसकिएको आरोप लगाएको छ । त्यसो त सोही क्षेत्रबाट केन्द्रीय सदस्य रहेका डा. गोपाल दहित पनि यही विवादका कारण समस्यामा परेका छन् ।
कांग्रेस बर्दियाका सभापति अरुणसिंह राठौरले निर्वाचन समितिको असक्षमताका कारण अनिर्णयको बन्दी बन्नुपरेको आरोप लगाए । नेपाल प्रेससँग कुरा गर्दै उनले आफ्नो जिम्मेवारी पूरा गर्न नसक्ने र समयमा कुनै निर्णय लिन नसक्ने भएकाले ढिलाई भएको र अहिलेसम्म रोकिएको बताए । ‘केन्द्रले दिएको जिम्मेवारी पूरा गरेर निर्वाचन समितिले टुंगाउने कुरा हो नि, समिति नै असक्षम, भयो, लाचार भयो, समितिले कुनै सेडुअल निकाल्न सकेको छैन, नियमित सम्पर्कमा आउन सकेको छैन,’ उनले भने ।
उता निर्वाचन समितिले भने असुरक्षाका कारण प्रतिनिधि छनौटको निर्वाचन टुंगाउन नसकेको पार्टीलाई रिपोर्टिङ गरेको छ तर समितिले कुनै विषय सार्वजनिक नगरी बसेको छ । बर्दियाको क्षेत्र नं १ मा देउवा समूहका प्रभावशाली नेता संजय गौतम छन् जहाँ प्रतिनिधि टुंगो लागिसकेको छ । तर गौतम सहभागी भएनन् । बर्दियामा देउवा पक्षले पार्टी सचिव रहेका जग्गाप्रसाद पाण्डेलाई संयोजक बनाएर वडाअधिवेशन गरेको छ ।
कांग्रेस लुम्बिनीका सहमहामन्त्री निमा गिरीले कुनै क्षेत्रको प्रतिनिधि रोकिएर महाधिवेशन नरोकिने बताइन् । ‘बर्दिया २ को प्रतिनिधि छनौट विवादका कारणले रोकिएको छ, हामीले निरन्तर समन्वय गरिरहेका छौं, त्यहाँ अग्रज नेता किशोरसिंह राठौर, नेता डा. गोपाल दहित, रामचन्द्र थापासहितका नेताहरु रोकिनुभएको छ, राठौर त सभापतिकै उम्मेदवारका रुपमा रहनुभएको छ,’ उनले भनिन्, ‘कुनै क्षेत्रको प्रतिनिधि टुंगो नलागेपनि महाधिवेशनको मिति यथावत रहन्छ, यसअघि पनि केही क्षेत्रमा यस्तो समस्या हुने गरेका थिए, क्रियाशील सदस्यकै विवाद हो ।’
