काठमाडौं । छठ पर्वको अवसरमा तराई झरेका राष्ट्रिय स्वतन्त्र पार्टी (रास्वपा)का सभापति रवि लामिछाने र पूर्वपत्रकार ऋषि धमलाबीच जनकपुरधाममा रोचक भेटघाट भएको छ ।
छठ पूजापछि सोमबार बिहान भएको भेटमा उनीहरूबीच विगतको राजनीतिक प्रसङ्ग, देशको नेतृत्व र विकासका विषयमा कुराकानी भएको थियो ।
भेटका क्रममा लामिछानेले विगतको निर्वाचनमा आफूले सहकार्यको प्रस्ताव गर्दा धमलाले अस्वीकार गरेको प्रसङ्ग सम्झाएका थिए । उनले भने, ‘सहकार्य गरेर जाऔँ भन्दा मेरो सल्लाह मान्नुभएन नि ।’
जवाफमा धमलाले आफूलाई टिकट प्रस्ताव गरिएको स्वीकार गर्दै देश बनाउने विषयमा शतप्रतिशत साथ दिने बताएका थिए ।
गत फागुन २१ गते सम्पन्न प्रतिनिधिसभा निर्वाचनका क्रममा रास्वपाका तर्फबाट उम्मेदवार बन्न लामिछाने र बालेन शाहले धमलालाई प्रस्ताव गरेका थिए । तर धमलाले उक्त प्रस्ताव स्वीकार गरेका थिएनन् ।
भेटका क्रममा धमलाले लामिछानेलाई बालेन शाहपछि प्रधानमन्त्री बन्नुपर्ने सुझावसमेत दिएका थिए ।
‘बालेन शाहपछि प्रधानमन्त्री बन्नुपर्छ,’ धमलाको सुझाव थियो ।
जवाफमा लामिछानेले रोचक शैलीमा भने, ‘पर्दैन, पर्दैन, किन चाहियो प्रधानमन्त्री ? हामीलाई केही पर्दै पर्दैन । प्रधानमन्त्री उत्पादन गर्दै जाउँला नि ।’




