२९,वैशाख काठमाडौँ । राष्ट्रिय स्वतन्त्र पार्टी(रास्वपा) सांसद रमेश प्रसाईंले जेनजी आन्दोलनका बेला प्रधानमन्त्री रहेका केपी ओली र गृहमन्त्री रमेश लेखक विरुद्ध अदालतमा मुद्दा नचालएकोमा सरकारको आलोचना गरेका छन् ।
मंगलबार संसद्को शून्य समयमा बोल्दै प्रसाईंले मुद्दा चलाउन ढिलाइ भएकोमा आलोचना गरेका हुन् ।
‘सहिदप्रतिको श्रद्धाञ्जली मैले मुखले औपचारिकता निभाएर होइन, मेरो प्रतिनिधित्व गर्ने सरकारको व्यवहारबाट पुष्टि हुनुपर्छ । जेनजी आन्दोलनका नरसंहारका अभियुक्तद्वय तत्कालीन प्रधानमन्त्री र गृहमन्त्रीविरुद्ध अदालतमा मुद्दा बुझाउन आजसम्म सरकारलाई कसले अड्कायो ? प्रमाण पुगेन कि प्राथमिकतामा परेन ?’, सरकारप्रति उनले प्रश्न गरे ।
विभिन्न आन्दोलनपछि गठन भएका मल्लिक आयोग, रायमाझी आयोगको प्रतिवेदन दराजमा थन्काइएको र लाल आयोगका प्रतिवेदन कार्यान्वयन नगरेर हरेक आन्दोलनका सहिदमाथि अन्याय भएको उनको भनाइ छ । प्रसाईंले उहिले बाजेको पाला र अहिलेको चाला उस्तै भयो भने हात्ती आयो फुस्सा हुने बताए ।
