रौतहट । बाराको कलैया उपमहानगरपालिका–१४ लक्ष्मिनिया चोकमा मोटरसाइकल दुर्घटनामा परी जनमत पार्टीका केन्द्रीय सदस्य सुजित पाण्डेको मृत्यु भएको छ ।
बिहीबार राति करिब १० बजे बघवनबाट कलैयातर्फ आउँदै गरेको मधेस प्रदेश ०३–०२८ प ७१९६ नम्बरको मोटरसाइकल आफैँ अनियन्त्रित भई दुर्घटना भएको जिल्ला प्रहरी कार्यालय बाराले जनाएको छ ।
दुर्घटनामा कलैया उपमहानगरपालिका–१४ निवासी ३३ वर्षीय पाण्डे गम्भीर घाइते भएका थिए । घटनालगत्तै अस्थायी प्रहरी पोस्ट बसपार्कबाट प्रहरी नायब निरीक्षक विमलेशकुमार यादवको कमान्डमा खटिएको टोलीले उनलाई उद्धार गरी उपचारका लागि प्रादेशिक अस्पताल कलैया पुर्याएको थियो ।
कलैया अस्पतालमा सामान्य उपचारपछि थप उपचारका लागि वीरगन्जस्थित बयोधा अस्पताल पठाइएको थियो । तर, बयोधा अस्पतालमा चिकित्सकले राति १०ः५० बजे पाण्डेलाई मृत घोषणा गरेका जिल्ला प्रहरी कार्यालय बाराका प्रवक्ता एवं डिएसपी मीनबहादुर घलेले जानकारी दिएका छन्।
पाण्डेको शव बयोधा अस्पतालमै राखिएको छ । दुर्घटनामा परेको मोटरसाइकल अस्थायी प्रहरी पोस्ट बसपार्कको नियन्त्रणमा रहेको प्रहरीले जनाएको छ ।
