जेनजी आन्दोलनको नाटक हेर्दाहेर्दै तीनजना बेहोस, सिभिल अस्पताल लगियो

काठमाडौं। काठमाडौंको नयाँ बानेश्वरमा आयोजित जेनजी सहिद दिवस कार्यक्रममा आन्दोलनका क्रममा भएका घटनामा आधारित नाटक हेर्दाहेर्दै तीन जना बेहोस भएपछि उपचारका लागि सिभिल अस्पताल लगिएको छ ।

बानेश्वरमा आज पनि जेनजी सहिद दिवसका अवसरमा विभिन्न कार्यक्रम तथा नाटक प्रस्तुत गरिएको थियो । कार्यक्रममा गत वर्षको जेनजी आन्दोलनका क्रममा भएका कारुणिक घटनालाई नाटक तथा भिडियोमार्फत प्रस्तुत गरिएको थियो ।

प्रदर्शनका क्रममा आन्दोलनकारीमाथि गोली प्रहार भएको, मानिसहरू घाइते भएको तथा मृत्यु भएका दृश्यहरू देखाइएको थियो । ती दृश्य हेर्ने क्रममा केही व्यक्तिले असहज महसुस गरेका थिए ।

तीनजनालाई असहज भएपछि उपचारका लागि सिभिल अस्पताल लगिएको काठमाडौं जिल्ला प्रहरी परिसरका प्रवक्ता एसपी दानबहादुर थापाले जानकारी दिए ।

उनका अनुसार नाटक तथा भिडियोमा देखाइएका दृश्य हेरेपछि असहज महसुस भएकाले उनीहरूलाई उपचारका लागि अस्पताल लगिएको हो ।