भारत एसँग नेपालको लज्जास्पद हार, २६ रनमै समेटियो नेपाली टोली

रेडियो काठमाण्डु
  • ख-
  • ख
  • ख+

अन्तिम पटक अध्यावधिक गरिएको

काठमाडौं । राइजिङ स्टार्स एसिया कपको पहिलो खेलमा नेपाली क्रिकेट टोली भारत एसँग ३०६ रनको फराकिलो अन्तरले पराजित भएको छ ।

शुक्रबार राति कतारको दोहामा सम्पन्न खेलमा भारत एले दिएको ३३३ रनको लक्ष्य पछ्याएको नेपाल ११औँ ओभरमै मात्र २६ रन बनाउँदै अलआउट भयो । नेपाली टोलीका कुनै पनि ब्याटरले दोहोरो अंकमा रन बनाउन सकेनन् । पवन सर्राफले सर्वाधिक ६ रन बनाए ।

नेपालको ब्याटिङ ध्वस्त पार्ने क्रममा भारतका प्रिन्स यादवले ५ विकेट लिए भने हर्षित रानाले ४ र शाहबाज अहमदले १ विकेट हात पारे ।

त्यसअघि टस हारेर पहिले ब्याटिङ गरेको भारत एले निर्धारित ५० ओभरमा ९ विकेट गुमाउँदै ३३२ रन बनाएको थियो । भारतका कुमार कुशाग्र र कप्तान तिलक वर्माले शतकीय पारी खेले । कुशाग्रले ११७ तथा तिलकले १०७ रन बनाए । त्यस्तै, सुर्यांश सेड्गेले १४ बलमा अविजित ३६ रन जोड्दा ओपनर वैभव सूर्यवंशीले २६ रन बनाए ।

भारतको ४२ रनमा ३ विकेट गुमिसकेको अवस्थामा कुशाग्र र तिलकले चौथो विकेटका लागि २०६ रनको उत्कृष्ट साझेदारी गर्दै टोलीलाई बलियो स्थितिमा पुर्‍याएका थिए ।

नेपालका लागि कप्तान सन्दीप लामिछाने र ललित राजवंशीले समान ३ विकेट लिए भने नन्दन यादवले २ र पवन सर्राफले १ विकेट लिए ।

प्रतियोगिताको पहिलो खेलमै निराशाजनक हार बेहोरेको नेपालले अब दोस्रो खेलमा आइतबार संयुक्त अरब इमिरेट्स (यूएई) सँग प्रतिस्पर्धा गर्नेछ ।

कुनै सल्लाह, सुझाव वा प्रतिकृयाको लागि 921radiokathmandu@gmail.com मा इमेल पठाउन सक्नुहुन्छ ।
प्रतिक्रिया दिनुहोस्

कभर स्टोरी