काठमाडौं, साउन २३ । उपप्रधान तथा शहरी विकासमन्त्री प्रकाशमान सिंहले सिंहदरबारस्थित निर्माणाधीन संघीय संसद भवनको बाँकी काम समयमा नै सम्पन्न गर्न गम्भीरताका साथ लागेको बताउनुभएको छ ।
सिंहदरबारमा शुक्रबार बसेको संघीय संसदको राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्याङ्कन समिति बैठकमा सिंहले नयाँ संसद भवन बनाउने क्रममा भएका कमीकमजोरीलाई सुधार गर्दै बाँकी काम समयमा नै सम्पन्न गर्न गम्भीरताका साथ लागेको बताउनुभएको हो ।
संसद भवन निर्माणको काम समयमा हुन नसकेको तथ्य खुला रुपमा नै रहेको अवस्थमा आफुले मन्त्रालयको जिम्मेवारी सम्हालेपछि सम्बन्धीत व्यक्तिहरुसंग पटक पटक छलफल गरिरहेको उहाले बताउनुभयो । सिंहले समयमा सम्पन्न नभएकाले अब विगतको गल्तीहरुलाई सुधार गर्दै अगाडि बढ्नेतिर जोड दिनुपर्ने उहाको भनाइ छ ।
समिति सभापति ठाकुर गैरेले पहिलो चरणमा प्रतिनिधिसभा र राष्ट्रियसभा बैठकमात्रै सञ्चालन गर्नका लागि भएपनि पूर्वाधार तयार पार्न सुझाव दिनुभयो । निर्माण कम्पनीका तर्फबाट आएका गुनासाहरुलाई समाधान गर्न समेत उहाले मन्त्रालयको ध्यानाकर्षण गराउनुभयो ।
सभापति गैरेले अवको एकमहिनाभित्र निर्माणाधीन संघीय संसद भवनको निरिक्षण गरिने जानकारी दिनुभयो । बैठकमा शहरी विकास मन्त्रालयका सचिव गोपाल प्रसाद सिग्देलले संसद भवन निर्माणको हालको कार्यतालिकाका बारेमा जानकारी गराउनुभएको थियो ।
