काठमाडौँ : युवा तथा खेलकुद मन्त्री बब्लु गुप्ताको अमेरिका भ्रमणका विषयमा नेपालमा चर्चामा आएको कार्यक्रमबारे गैरआवासीय नेपाली संघ (एनआरएनए) अमेरिकाले स्पष्टीकरण दिएको छ।
संघले प्रेस विज्ञप्ति जारी गर्दै स्पष्ट पारेको छ कि अमेरिकामा मन्त्री गुप्ताका लागि कुनै कार्यक्रम आयोजना गरिएको छैन र उनलाई कुनै निमन्त्रणा गरिएको छैन।
विज्ञप्तिमा एनआरएनए अमेरिकाको नाम, लोगो, इआईएन नम्बर तथा डिजिटल पहिचान दुरुपयोग गरी केही व्यक्तिहरू वा समूहले अवैध र अनधिकृत गतिविधि सञ्चालन गरेको विषयमा गम्भीर ध्यानाकर्षण गरिएको उल्लेख छ।
एनआरएनए अमेरिकाले भन्यो कि संस्थाको आधिकारिक स्वीकृति वा निर्णयबिना गरिएका कार्यक्रम, आर्थिक संकलन वा अन्य गतिविधि पूर्ण रूपमा गैरकानुनी हुने र त्यसको जिम्मेवारी सम्बन्धित व्यक्ति वा समूहमाथि पर्नेछ।
यसै सन्दर्भमा अमेरिकी होमल्याण्ड सेक्युरिटी र नेपालस्थित अमेरिकी दूतावासलाई औपचारिक जानकारी दिइसकिएको संघले जनाएको छ।
