२२,वैशाख हेटौँडा । नेपाली कांग्रेस बागमती प्रदेश संसदीय दलको बैठकमा प्रदेशसभाको सभामुख चयन र मन्त्रिपरिषद् पुनर्गठनबारे छलफल भएको छ।
सोमबार साँझ ललितपुरमा बसेको बैठकले पार्टी सभापति गगन कुमार थापा र सहमहामन्त्री बहादुर सिंह लामासँग छलफल गरेर वैशाखभित्रै सभामुख चयन गर्ने निष्कर्ष निकालेको हो ।
बैठकले प्रशासनक पुर्नसंरचनाको कामलाई निर्णयमा पुर्याएर मन्त्रिमण्डल घटाउने निर्णय गरेको छ । उक्त कार्य वैशाख महिनामा टुंग्याउन गरी मुख्यमन्त्री इन्द्रबहादुर बानियाँलाई जिम्मा दिने बैठकले निर्णय गरेको संसदीय दलका सचिव सांसद मीनकृष्ण महर्जनले जानकारी दिए ।
बैठकले आगामी आर्थिक वर्ष २०८३/०८४ को बजेट तथा आयोजना छनोटका लागि निर्वाचन क्षेत्र केन्द्रीत भएर छलफल गर्ने निर्णय गरेको छ । आगामी वर्षका लागि आयोजनाहरु छनोट गर्दा हचुवाका भरमा नगरी प्रदेशसभा सदस्यहरूको माग र भौगोलिक आवश्यकतालाई मुख्य आधार बनाइने बैठकले निर्णय गरेको महर्जनको भनाइ छ ।
बजेटलाई जनमुखी र सन्तुलित बनाउनका लागि सम्बन्धित क्षेत्रका जनप्रतिनिधिको सुझाव र भूगोलको विशिष्टतालाई प्राथमिकता दिने दलको तयारी समेत रहेको उनले बताए ।
बानियाँमाथि राजनीतिक पूर्वाग्रह साँघेर अनुसन्धानको नाममा सामाजिक प्रतिष्ठामा आघात पुग्ने काम भएको संसदीय दलको जिकिर छ । तर संविधान र कानुनअनुसारको अनुसन्धानमा सघाउने निर्णय बैठकले गरेको महर्जनले बताए ।
