१५ असोज, काठमाडौं । राष्ट्रिय स्वतन्त्र पार्टी (रास्वपा) का सांसद राजीव खत्रीले भोलि आयोजना गर्न लागेको पत्रकार भेटघाट तथा अन्तरक्रिया कार्यक्रम पत्रकारहरूले बहिष्कार गर्ने भएका छन् ।
नेपाल पत्रकार महासंघका केन्द्रीय सदस्य सूर्य सुवेदीका अनुसार खत्रीले पत्रकारहरूको मानमर्दन गर्नुका साथै सिंगो प्रेस जगतको अपमान हुनेगरी संसदमा आपत्तिजनक अभिव्यक्ति दिएकाले उनको कार्यक्रममा पत्रकारहरूले सहभागिता नजनाउने निर्णय गरेका हुन् । यसबारे अहिले महासंघका पदाधिकारी तथा सदस्यहरूबीच छलफल चलिरहेको र छिट्टै औपचारिक निर्णय गर्ने उनले जानकारी दिए ।
सञ्चारकर्मबाटै राजनीतिमा आएका सांसद खत्रीले हिजोको प्रतिनिधि सभा बैठकमा पत्रकारहरूलाई ‘असन को साँढे’ को संज्ञा दिँदै गुण्डागर्दी नगर्न चेतावनी दिएका थिए । प्रेस काउन्सिलका अध्यक्ष उमेश श्रेष्ठलाई केही पत्रकार नेताले झ्यालबाट फ्याँक्ने भन्दै धम्की दिएको दाबी गर्दै उनले भनेका थिए- ‘यस्तो धम्की दिने पत्रकारहरू हुन् कि गुन्डा हुन् ? पत्रकारका नाममा कसैलाई धम्की दिने यिनीहरू असनका साँढे हुन् ।’
त्यस्तै, सहकारी ठगीका आरोपित जिबी राई पक्राउको विषयलाई लिएर संसद भवन बाहिर एक पत्रकारसँग उनको बाझाबाझ भएको थियो । विगतमा आफूहरूले सरकार चलाउन पाए २४ घण्टामा राईलाई समातेर नेपाल ल्याउने भन्नेहरूले यतिका दिनसम्म किन पक्राउ नगरेको भन्ने प्रश्नमा उनी पत्रकारसँग बेस्कन जंगिएका थिए ।
उनै खत्रीले भोलि बिहान ८ बजे सूर्य विनायक नगरपालिकास्थित्र क्लब बागमतीमा पत्रकार सम्मेलन गर्न लागेका छन् । उनको तर्फबाट सचिवालयले हिजो प्रकाशित गरेको सूचनामा समसामयिक विषय र जनसरोकारका विविध सवालमा संचारकर्मीहरूसँग प्रत्यक्ष संवाद तथा अन्तरक्रिया गर्न लागेको जानकारी गराइएको छ ।
तर, पत्रकारहरूले बहिष्कार गर्न लागेको थाहा पाएपछि अन्तर्किया कार्यक्रम स्थगित भएको सूचना पाएको महासंघका केन्द्रीय सदस्य सुवेदीले जानकारी दिए । खत्रीका व्यवहार सिंगो प्रेस जगतकैविरुद्धमा रहेकाले उनका कुनै पनि कार्यक्रममा सहभागी नहुनसमेत सुवेदीले सबै संचारकर्मीलाई अपिल गरेका छन् ।
यता, महासंघले पनि सांसद खत्रीलाई आफ्नो अभिव्यक्ति फिर्ता लिँदै क्षमायाचना गर्न भनेकाे छ । महासचिव रामप्रसाद दाहालले भर्खरै जारी गरेको विज्ञप्तिमा संवैधानिक अधिकारको ख्याल नगरी प्रेसविरुद्ध दुषित मानसिकता राखेर पत्रकार र प्रेस जगतलाई धम्क्याउने वा अपमानित गर्ने कार्य स्वीकार्य नहुने स्पष्ट परिएको छ ।
‘महासंघ खत्रीको प्रेसविरोधी अभिव्यक्तिप्रति खेद प्रकट गर्दछ र यसप्रति क्षमा याचना गर्न आग्रह गर्दछ’,विज्ञप्तिमा लेखिएको छ, ‘विवादित अभिव्यक्तिका कारण खत्रीले शुक्रबारबारका लागि राखेको अन्तर्किया भक्तपुरका पत्रकारले वहिष्कार गर्ने जनाउ दिएबाट तत्काल क्षमा माग्नुको विकल्प देखिंदैन ।’
