काठमाडौं । आईसीसी विश्वकप लिग–२ अन्तर्गत नेपालले ओमानमाथि ११३ रनको शानदार जित निकालेको छ । भर्खरै सम्पन्न खेलमा नेपालले दिएको २६४ रनको लक्ष्य पछ्याएको घरेलु टोली ओमान ३९.६ ओभरमा १५० रनमै अलआउट भयो ।
ओमानका कप्तान विनायक शुक्लाले ७७ रनको योगदान दिए पनि टोलीलाई जित दिलाउन सकेनन् । त्यस्तै, जय ओडेद्राले २५ र जतिन्दर सिंहले १८ रन बनाए ।
ओमानलाई सस्तैमा समेट्ने क्रममा नेपालका सन्दीप लामिछाने र नन्दन यादवले तीन–तीन विकेट लिए । दीपेन्द्र सिंह ऐरीले दुई तथा करण केसी र ललित राजवंशीले एक–एक विकेट हात पारे ।
त्यसअघि टस जितेर पहिले ब्याटिङ गरेको नेपालले निर्धारित ५० ओभरमा ८ विकेट गुमाउँदै २६३ रन बनाएको थियो ।
नेपालका लागि रोहित पौडेलले सर्वाधिक ६१ रन बनाए । उनले ६७ बलमा अर्धशतकीय इनिङ्स खेले । करण केसीले आक्रामक ब्याटिङ गर्दै मात्र १६ बलमा ४० रन जोडे । उनको इनिङ्समा चार छक्का र एक चौका समावेश थियो ।
त्यस्तै, अर्जुन कुमालले ४०, इर्शान पाण्डे र बसिर अहमदले समान ३७ तथा दीपेन्द्र सिंह ऐरीले २२ रन बनाए ।
ओमानका बलर शकिल अहमद, करण सोनाभेल र शाह फैसलले दुई–दुई विकेट लिए भने हसनइन शाहले एक विकेट लिए ।
यसअघि लिग–२ अन्तर्गतकै खेलमा नेपालले क्यानडालाई २४ रनले पराजित गरेको थियो । ओमानमाथिको जितसँगै नेपालले प्रतियोगितामा लगातार दोस्रो सफलता हात पारेको छ ।
