काठमाडौं । स्थानीय तह निर्वाचनको तयारीका विषयमा निर्वाचन आयोगमा राष्ट्रिय मान्यताप्राप्त राजनीतिक दलका शीर्ष नेताहरूबीच छलफल जारी रहेको छ ।
छलफलमा राष्ट्रिय स्वतन्त्र पार्टी (रास्वपा) का सभापति रवि लामिछाने, नेपाली कांग्रेसका सभापति गगन थापा, नेकपाका संयोजक पुष्पकमल दाहाल ‘प्रचण्ड’ लगायतका शीर्ष नेताहरू सहभागी छन् ।
यस्तै, नेकपा एमालेका अध्यक्ष केपी शर्मा ओली भने बैठकबाट बाहिरिएका छन् । उनको स्थानमा एमालेका तर्फबाट नेता देवेन्द्र दाहाल छलफलमा सहभागी भएका छन् ।
बैठकमा सहभागी नभई बाहिरिएका ओलीले आफू बैठकमा उपस्थित भएको जानकारी दिनका लागि आएको बताएका छन् । सबै दलका शीर्ष नेतृत्व सहभागी हुँदा आफू किन नबसेको भन्ने सञ्चारकर्मीको प्रश्नमा उनले एमालेमा पनि सोही तहका नेता रहेको र उनी बैठकमा सहभागी भएको जवाफ दिएका छन् ।
‘आउँदै आएन भन्ने नपरोस् भनेर आएको हुँ,’ ओलीले सञ्चारकर्मीसँग भनेका छन् ।




