काठमाडौँ । सरकारले अध्ययन तथा असाधारण बिदा सकिएपछि पनि कार्यक्षेत्रमा नफर्कने र सम्पर्कविहीन हुने निजामती कर्मचारीहरूलाई ३ दिनभित्र कार्यालयमा हाजिर हुन निर्देशन दिएको छ ।
भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयका प्रवक्ता सहसचिव एकदेव गिरीले सूचना जारी गर्दै बिदा अवधि समाप्त भए पनि कार्यालयमा हाजिर नभएका कर्मचारीलाई ३ दिनभित्र कार्यालयमा हाजिर नभएमा कारबाही गर्ने प्रक्रिया अगाडि बढाउने चेतावनी दिएका हुन् ।
सूचनामा मन्त्रालयका अनुसार अध्ययन वा असाधारण बिदामा रहेका केही कर्मचारीहरू बिदा सकिएपछि पनि नियमअनुसार कार्यालयमा हाजिर नभएको र लामो समयदेखि सम्पर्कमा समेत नरहेको पाइएको उल्लेख छ।
साथै, कतिपय कर्मचारी हाजिर भए पनि उनीहरूको व्यक्तिगत विवरण राष्ट्रिय किताब खानामा अद्यावधिक नभएको देखिएको भन्दै अधिकारीले सूचना प्रकाशित भएको मितिले ३ दिनभित्र अनिवार्य रूपमा राष्ट्रिय किताबखाना (निजामती) मा आफ्नो अभिलेख अद्यावधिक गराउन निर्देशन दिएका छन् ।
मन्त्रालयले सबै मन्त्रालय, आयोग, सचिवालय र केन्द्रीय स्तरका कार्यालयहरूलाई पनि आफ्ना कर्मचारीहरूको विवरण यकिन गर्न भनेको छ। बिदा स्वीकृत भएका कर्मचारीहरूको विवरण, बिदा सकिएपछि हाजिर भए–नभएको अवस्था र अन्य आवश्यक विवरण राष्ट्रिय किताबखानासँग समन्वय गरी ३ दिनभित्रै अद्यावधिक गर्न मन्त्रालयले अनुरोध गरेको हो ।
बिदा अवधि समाप्त भएर पनि कार्यालयमा हाजिर नहुने वा लामो समयदेखि सम्पर्कमा नरहने कर्मचारीहरूको हकमा प्रचलित कानुन बमोजिम कडा कारबाहीको प्रक्रिया अगाडि बढाइने मन्त्रालयका प्रवक्ता एवं सहसचिव अधिकारीले जारी गरेको सूचनामा उल्लेख छ ।
पछिल्लो समय बिदा लिएर विदेश जाने वा अन्य पेशामा लाग्ने तर बिदा सकिएपछि पनि सरकारी सेवामा नफर्कने प्रवृत्ति बढिरहेको छ ।
