काठमाडौं, २८ असार । नक्कली भुटानी शरणार्थी प्रकरणमा फरार रहेका एक जनालाई प्रहरीले पक्राउ गरेको छ ।
काठमाडौं उपत्यका अपराध अनुसन्धान कार्यालयले सानोभ¥याङबाट थप एक जनालाई पक्राउ गरेको एसपी रविन्द्र रेग्मीले जानकारी दिनुभयो ।
प्रहरीले काठमाडौं महानगरपालिका-३० घर भई नयाँबजार खुशिबु बस्ने ५९ वर्षीय केशव तुलाधरलाई पक्राउ गरेको हो । तुलाधरमाथि कारबाहीको लागि जिल्ला प्रहरी परिसर काठमाडौंमा पठाएको एसपी रेग्मीले बताउनुभयो ।
प्रहरीका अनुसार भुटानी शरणार्थी प्रकरणमा तुलाधरको बैंक खाता प्रयोग भएको थियो । उनीसहित ३० जनाविरूद्ध काठमाडौं जिल्ला अदालतमा ठगी तथा संगठित अपराध कसुरमा मुद्दा दर्ता छ ।
अदालतले १६ जनालाई पुर्पक्षका लागि थुनामा पठाउन आदेश दिएको थियो । जसमध्ये दुई जनालाई धरौटीमा छाड्न आदेश दिएको थियो । अदालतको आदेशपछि पक्राउ पर्नेमा तुलाधर दोस्रो व्यक्ति हुन् । यसअघि जिल्ला प्रहरी परिसर काठमाडौंले गत असार ११ मा आशिष बुढाथोकीलाई पक्राउ गरेको थियो ।
नक्कली भुटानी शरणार्थी प्रकरणमा १० जना अझै फरार रहेको प्रहरीले जनाएको छ ।
