काठमाडौं, ३० असार। कानुन, न्याय तथा संसदीय मामिलामन्त्री धनराज गुरुङले मुलुकलाई सुशासनतर्फ अघि बढाउन एकपछि अर्को भ्रष्टाचारका फाइल खोल्दै जाने बताउनुभएको छ ।
उज्यालो भविष्य संस्थाको बार्षिकोत्सवका अवसरमा शनिबार काठमाडौंमा आयोजित कार्यक्रममा मन्त्री गुरुङले बिगतदेखि नै भ्रष्टाचारका कारण मुलुक अघि बढ्न नसकेको भन्दै अव मुलुकलाई सुशासनतर्फ अघि बढाउन एकपछि अर्को भ्रष्टाचारका फाइल खोल्दै जाने बताउनुभएको हो ।
उहाले यसअघि भ्रष्टाचारका मुद्धामा अनुसन्धान अघि बढाउदा दलहरुकै नेता मुछिएपछि अनुसन्धान नै रोकिने गरेकाले अव भने भ्रष्टाचारका फाइल खोल्दा कसैको अनुहार नहेर्ने स्पष्ट पार्नुभयो । अहिले अनुसन्धान अघि बढाएका फाइलहरु यसअघि जस्तो बिचैमा बन्द नहुने उहाको भनाइ छ ।
उहाले भ्रष्टाचारीहरु मिलेर हटाउन खोजेपछि त्यसको सामना गर्न तयार रहेको जिकिर गर्नुभयो । मन्त्री गुरुङले आफ्नो अनुहारमा दाग बोकेर ऐना पुछ्ने प्रवृतिले राजनीतिमा समस्या बढेको भन्दै अनुहारको दाग पुछ्ने काम मात्रै भएपनि नेपालको राजनीति सुध्रने बताउनुभयो ।
उहाले राजनीतिमा लागेका व्यक्तिहरुले जनताको निराशालाई आशामा बदल्न सक्नुपर्ने भन्दै बदल्न नसके राजनीतिक छाड्न तयार हुनुपर्ने पनि धारणा राख्नुभयो ।
