काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले महाविपद्का बेला सर्वस्व गुमाएका नागरिकको आक्रोशलाई लक्षित गरेर सामाजिक सञ्जाल तथा सार्वजनिक स्थानमा टीकाटिप्पणी र कटाक्ष गर्ने काम बन्द गर्न आग्रह गरेका छन् ।
बुधबार प्रतिनिधिसभामा सम्बोधन गर्दै लामिछानेले विपद्मा परेका नागरिकको पीडामाथि तुच्छ टिप्पणी नगर्न आग्रह गरेका हुन् ।
‘यो महाविपद्को समयमा सर्वस्व गुमाएका नागरिकको स्वाभाविक आक्रोशलाई लक्षित गरेर सामाजिक सञ्जाल वा चोकचौतारोमा तुच्छ टीकाटिप्पणी र कटाक्ष गर्ने कार्य आजै र अहिल्यै बन्द गरौँ,’ लामिछानेले भने ।
उनले विपद्मा परेका नागरिकमाथि दुर्व्यवहार गर्ने व्यक्तिमाथि कारबाही गर्न सरकारसँग आग्रहसमेत गरे ।
‘सरकारलाई मेरो स्पष्ट आग्रह छ– पीडामा रहेका नागरिकलाई यस्ता दुर्व्यवहार भएका छन् भने हामी निर्मम हुन्छौँ भनेर विज्ञप्ति निकाले मात्रै पुग्दैन,’ उनले भने, ‘राज्य साँच्चै निर्मम छ र पीडितको पक्षमा उभिन्छ भन्ने कुरा नागरिकले महसुस गर्नेगरी देखाउने हो । देखाइदिनुहोला ।’
लामिछानेले रास्वपालाई पनि विपद्मा परेका नागरिकलाई होच्याउने अन्ध समर्थक आवश्यक नरहेको बताए ।
‘राष्ट्रिय स्वतन्त्र पार्टीलाई विपद्मा रुँदै गरेका नागरिकलाई होच्याउने अन्ध समर्थक चाहिएको छैन,’ उनले भने, ‘हामीलाई त शोक र पीडामा परेका भुइँमान्छेको पक्षमा उभिने र उनीहरूको आँसु पुछ्ने सदस्यहरू चाहिएको छ ।’
पार्टीको कुनै पनि तहका सदस्य वा पदाधिकारी विपद्मा परेका नागरिकलाई सामाजिक सञ्जालमा तुच्छ टिप्पणी गर्ने वा साइबर बुलिङमा संलग्न भएको पाइए कारबाही गरिने लामिछानेले चेतावनी दिए ।
