काठमाडौं । नेपाली सेनाका प्रधानसेनापति अशोकराज सिग्देल चीन प्रस्थान गरेका छन् ।
सैनिक मुख्यालय जंगी अड्डाका अनुसार प्रधानसेनापति सिग्देल २८ भदौदेखि ३ असोजसम्म चीन भ्रमणमा रहनेछन् ।
भ्रमणका क्रममा उनले बेइजिङमा आयोजना हुने १३औँ बेइजिङ स्याङसन फोरममा सहभागिता जनाउने बताइएको छ ।
चीन प्रस्थान गर्नुअघि त्रिभुवन अन्तर्राष्ट्रिय विमानस्थलमा उनलाई बलाधिकृत रथी प्रदीप जंग केसीले बिदाइ गरेका थिए ।
प्रधानसेनापति सिग्देलको चीन भ्रमणले दुई देशबीचको सैनिक सम्बन्ध विस्तार गर्न तथा सैनिक कूटनीतिमार्फत नेपालको परराष्ट्र नीतिमा योगदान पुर्याउने अपेक्षा गरिएको छ ।
प्रधानसेनापति सिग्देल चीनमा रहेका बेला बलाधिकृत रथी प्रदीप जंग केसीले कायममुकायम प्रधानसेनापतिको जिम्मेवारी सम्हाल्नेछन् ।
