काठमाडौं । प्रतिपक्षी दल नेकपा एमालेले विपत्तिको समयमा ‘म एक्लै काफी छु’ भन्ने घमण्ड नगर्न सरकारलाई आग्रह गरेको छ।
मंगलबार प्रतिनिधिसभा बैठकमा सम्बोधन गर्दै एमाले सांसद पद्मा अर्यालले बाढीपछि गर्नुपर्ने तत्कालका काममा सरकार केही ठाउँमा चुकेको आरोप लगाइन्।
उनले विपत्तिको समयमा सरकारले सार्वजनिक आह्वान, अनुरोध तथा कूटनीतिक पहलमार्फत सहयोग माग्नुपर्ने भए पनि त्यसो गर्न नसकेको बताइन्। साथै, विद्यालय तथा क्याम्पसमा रहेका इन्जिनियर र विभिन्न क्षेत्रका विज्ञसँग समन्वय गरी परिचालन गर्न पनि सरकार चुकेको उनको भनाइ छ।
‘सरकारले तत्काल सार्वजनिक आह्वान, अनुरोध, कूटनीतिक पहलमार्फत सहयोग माग गर्नुपर्थ्यो । हामी यहाँ चुक्यौं । हाम्रा विद्यालय वा क्याम्पसका इन्जिनियर वा विभिन्न विज्ञसँग सम्पर्क गरी परिचालन गर्ने कुरामा पनि चुक्यौं,’ उनले भनिन्।
सांसद अर्यालले विपद्का अनुभवबाट शिक्षा लिँदै सरकारले तत्काल सर्वदलीय बैठक बोलाएर छलफल गर्नुपर्ने भए पनि त्यसो हुन नसकेको बताइन्।
प्रधानमन्त्रीलाई सम्बोधन गर्दै उनले देश र जनताको माया सबैलाई बराबर हुने भन्दै विपत्तिको समयमा सबै पक्षको सहयोग र सहकार्य आवश्यक रहेको बताइन्।
‘म भन्न चाहन्छु, यो विपत्तिको बेला म एक्लै काफी छु भन्ने घमण्ड नगर्नुस् । प्रधानमन्त्रीज्यू, देश र जनताको माया तपाईंलाई बढी र हामीलाई कम भन्ने हुन सक्दैन,’ उनले भनिन्।
सरकारले केही काम गरेको स्वीकार गर्दै उनले विपत्तिको समयमा अझ धेरै काम गर्न सकिने अवस्था रहेको बताइन्।
