काठमाडौँ । प्रधानमन्त्री वालेन्द्र शाहसँग नेपालका लागि जापानका राजदूत मेइदा तोरुले शिष्टाचार भेट गरेका छन् ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा प्रधानमन्त्री शाहले नेपालका बाढीपीडितप्रति जापानले देखाएको सद्भाव, ऐक्यबद्धता, सहानुभूति तथा समवेदनाका लागि धन्यवाद तथा आभार व्यक्त गरे ।
प्रधानमन्त्री शाहले जापान सरकारले जाइकामार्फत उपलब्ध गराएको राहत सामग्री र अनुदान सहायताका लागि पनि धन्यवाद ज्ञापन गरे ।
जापान नेपालको महत्त्वपूर्ण विकास साझेदार रहेको उल्लेख गर्दै उनले विपद्पछिको पुनःनिर्माण तथा पुनःस्थापनामा समेत जापानको सहयोगको अपेक्षा व्यक्त गरे ।
भेटका क्रममा राजदूत तोरुले जापान सरकारले नेपालका विपद् प्रभावितको पुनःस्थापना तथा पुनःनिर्माणमा सहयोग गर्ने प्रतिबद्धता व्यक्त गरे ।
नेपालमा बाढी तथा यस्ता विपद्को उच्च जोखिम रहेको उल्लेख गर्दै उनले विपद्का कारण तथा त्यसबाट हुने क्षतिबारे थप वैज्ञानिक अध्ययन तथा अनुसन्धान गर्न आवश्यक रहेकोमा जोड दिए ।
राजदूत तोरुले नेपाल–जापानबीच आपसी सम्बन्धका विविध आयाममा रहिआएको सहकार्यका साथै पूर्वाधार विकास, प्रविधि हस्तान्तरण र शिक्षा क्षेत्रको सुधारलगायत विषयमा आफ्ना धारणा राखे । जापान लामो समयदेखि नेपालको विकासको साझेदार रहँदै आएको छ ।
