इरान समर्थित हुथी समूहले साउदी अरबको राजधानी रियादस्थित अन्तर्राष्ट्रिय विमानस्थलमा गरेको आक्रमणमा कम्तीमा १२ जनाको मृत्यु भएको छ भने ३०९ जना घाइते भएका छन् ।
साउदी अधिकारीहरूले शनिबार भएको आक्रमणलाई एक दशकभन्दा बढी समययताकै राज्यमा भएको सबैभन्दा घातक आक्रमण बताएका छन् ।
साउदी नागरिक उड्डयन प्राधिकरणका अनुसार मृत्यु हुनेमा चार साउदी नागरिक, दुई बंगलादेशी तथा अमेरिका, जोर्डन, प्यालेस्टाइन, सिरिया, सुडान र इजिप्टका एक–एक जना छन् । घाइतेमध्ये केहीको अवस्था गम्भीर रहेको बताइएको छ ।
आक्रमणपछि घाइतेलाई एम्बुलेन्स तथा हेलिकोप्टरमार्फत अस्पताल पुर्याइएको थियो । प्रत्यक्षदर्शीका अनुसार विमानस्थलभित्र विस्फोटपछि कैयौं मानिस घाइते अवस्थामा भुइँमा देखिएका थिए भने दर्जनौं एम्बुलेन्स विमानस्थलतर्फ पुगेका थिए ।
शनिबारको आक्रमणअघि यही साता किङ खालिद अन्तर्राष्ट्रिय विमानस्थलमा भएका दुई हुथी आक्रमणमा चार जनाको मृत्यु भएको थियो । ती आक्रमणमा विमानस्थलको धावनमार्गमा राखिएको साउदी वाणिज्यिक विमानमा समेत ठूलो क्षति पुगेको थियो ।
आक्रमणपछि रियादतर्फका सबै उडान डाइभर्ट वा रद्द गरिएको थियो भने विमानस्थलको सेवा केही समयका लागि बन्द गरिएको साउदी नागरिक उड्डयन प्राधिकरणले जनाएको छ । हुथी समूहले समेत आक्रमणपछि रियाद अन्तर्राष्ट्रिय विमानस्थल बन्द गराएको दाबी गरेको छ ।
साउदी नेतृत्वको सैन्य गठबन्धनले आक्रमणको जवाफ दिने प्रतिबद्धता जनाएको छ । साउदी अरब र यमनको सरकार समर्थित पक्षले हुथी नियन्त्रणमा रहेका क्षेत्रमा सयौं हवाई आक्रमण गरेको दाबी गरेका छन् ।
हुथी समूहले ती आक्रमणमा महिला तथा बालबालिकासहित सर्वसाधारण मारिएको दाबी गरे पनि ती दाबीलाई स्वतन्त्र रूपमा पुष्टि गर्न नसकिएको अन्तर्राष्ट्रिय सञ्चारमाध्यमले जनाएका छन् ।
अमेरिकी राष्ट्रपति डोनाल्ड ट्रम्पले अमेरिकाले हुथीविरुद्ध साउदी आक्रमणमा सहभागी हुने सम्भावना रहेको बताएका छन् । अमेरिकी विदेशमन्त्री मार्को रुबियोले आक्रमणको निन्दा गर्दै यसले निर्दोष नागरिकको जीवनप्रति ‘स्पष्ट बेवास्ता’ देखाएको बताएका छन् ।
साउदी अरबले सन् २०१५ मा हुथीलाई यमनको राजधानी सानाबाट हटाउने उद्देश्यले अरब गठबन्धनको नेतृत्व गर्दै यमन युद्धमा प्रवेश गरेको थियो । सन् २०२२ मा हुथीसँग भएको सम्झौतापछि द्वन्द्व केही समय रोकिए पनि पछिल्लो गर्मीयाममा युद्ध पुनः चर्किएको समाचारमा उल्लेख छ ।
यसैबीच, रियादमा ठूला ऊर्जा तथा लगानी सम्मेलन आयोजना हुन लागेका बेला विमानस्थलमा भएको आक्रमणले थप सुरक्षा चुनौती खडा गरेको छ । सम्मेलन आयोजकहरूले भने शनिबारको आक्रमणअघि कार्यक्रम निर्धारित योजनाअनुसार नै हुने बताएका थिए ।
